Boris Johnson chega ao poder coa promesa de culminar o Brexit o próximo 31 de outubro
Boris Johnson foi elixido este martes novo líder do Partido Conservador británico, como resultado dunha votación entre os militantes da formación, e o mércores asume o cargo de primeiro ministro coa promesa de culminar o Brexit o 31 de outubro.
Como se esperaba, Johnson, de 55 anos e exalcalde de Londres, arrasou nos comicios convocados despois de que a aínda primeira ministra, Theresa May, dimitise en xuño pola crise do Brexit ao non conseguir que o Parlamento aprobase o seu acordo de saída da Unión Europea.
O exministro de Exteriores obtivo 92.153 votos, fronte aos 46.656 do seu adversario, o actual titular do Foreign Office, Jeremy Hunt, nunha campaña que contou cunha participación do 87,4% —160.000 militantes tiñan dereito ao voto—.
Tras ser declarado gañador, nun evento celebrado no centro de conferencias Queen Elizabeth II de Londres, fronte ao Parlamento de Westminster, o novo líder prometeu materializar o Brexit o 31 de outubro, unir o Reino Unido e impedir a chegada ao poder do líder da oposición laborista, Jeremy Corbyn. Asegurou que "dará enerxía" ao país e que o contaxiará de espírito positivo e dun sentimento de que as cousas se poden "facer".
Na súa breve intervención, Johnson agradeceu o traballo de May e aos membros da súa formación pola "extraordinaria honra e privilexio" que lle conferiron ao elixilo como o seu líder.
Desde a residencia oficial de Downing Street, May felicitou a Johnson e prometeulle o seu "total" apoio, en tanto que Corbyn recriminou ao político que recibiu o apoio duns poucos afiliados conservadores "non representativos" do país.
Dous ministros anunciaron a súa renuncia tras coñecer a elección de Johnson
'DIVORCIO'. O próximo 'premier' deixou claro que cumprirá coa data do 'divorcio' da UE o 31 de outubro, con ou sen acordo, proceso que cualificou como unha aposta "a todo ou nada".
Así, Johnson chega este mércores ao poder co principal labor de desenredar o nó do Brexit, unha tarefa complexa dada a oposición que hai entre os deputados dos distintos partidos a unha saída do bloque europeo sen consenso.
Varios ministros do Executivo de May, entre eles o titular de Economía, o proeuropeo Philip Hammond, adiantaron que non servirán no Goberno de Johnson, mentres que o ministro de Xustiza, o tamén proeuropeo David Gauke, xa presentou este martes a súa dimisión. Tamén o ministro de Desenvolvemento Internacional e exaspirante a suceder a Theresa May, Rory Stewart, anunciou a súa renuncia. Ademais, a secretaria de Estado de Educación, Anne Milton, deixou o posto pola "súa preocupación" sobre un Brexit ás bravas.
Neste sentido, a axencia Moody's advirte de que a hipótese dun Brexit caótico, en caso de materializarse, tería "significativos efectos negativos" na solvencia do Reino Unido, engadindo que o prolongado período de incerteza xa resulta negativo ao frear o investimento a longo prazo, a expansión comercial e as decisións de contratación.
Desde S&P Global, pola súa banda, faise fincapé en que, a pesar do compromiso de Boris Johnson de abandonar a UE o próximo 31 de outubro, "aínda falta por ver se o Parlamento permite unha retirada sen acordo". A este respecto, os analistas da axencia advirten de que, logo da pausa das vacacións estivais, existe un tempo limitado para negociar coa UE, que mostrou escasa predisposición para reabrir o acordo pactado con Theresa May, polo que, co obxectivo de evitar un Brexit duro, consideran que Reino Unido buscará un novo adiamento.