Dan de alta en Xapón ao neno máis pequeno do mundo en sobrevivir, nacido con 268 gramos

Un hospital de Tokio deu a alta médica a un bebé nacido o pasado agosto con 268 gramos de peso e que permanecía desde entón nunha incubadora, o que o converte no neno máis pequeno do mundo que sobrevive a un parto prematuro. Naceu por un procedemento de urxencia no hospital da Universidade de Keio e foi tratado en coidados intensivos para neonatos ata alcanzar os 3.238 gramos, segundo confirmou o médico a cargo, Takeshi Arimitsu.

Segundo a Universidade de Keio, trátase do neno máis pequeno en sobrevivir a un parto prematuro, unha marca que ata agora ostentaba un bebé nacido en Alemaña en 2009 con 274 gramos de peso. Tamén no país xermano naceu en 2015 a nena máis pequena da que ata agora se ten constancia, con só 252 gramos.

En Xapón, a taxa de supervivencia de neonatos con menos dun quilo de peso é do 90 por cento, aínda que esta proporción redúcese a menos do 50% para os bebés de menos de 300 gramos.

Arimitsu destacou que aínda que se trataba dun caso "de moito risco", o éxito demostra "que hai posibilidades de que o bebé salga do hospital a pesar de nacer moi pequeno".

Pola súa banda, a nai do neno, quen non quixo facer público o seu nome, expresou a súa "felicidade por velo tan grande" e logo de non "saber se podería sobrevivir".