Estados Unidos anuncia oficialmente a creación dun Exército Espacial
O Goberno deu instrucións ao Capitolio para que destine 8.000 millóns de dólares nos próximos anos co obxectivo de que esta rama estea operativa en 2020
O vicepresidente de Estados Unidos, Mike Pence, anunciou este xoves unha nova normativa que establecerá "os pasos exactos a tomar" para a creación dun Exército dedicado á seguridade no Espazo, un escenario que, segundo dixo, xa se converteu nun "novo campo de batalla".
"Chegou o momento de establecer un Exército Espacial. Este documento establece os pasos exactos a tomar para crear unha Forza Espacial", declarou Pence durante un acto oficial celebrado no Pentágono no que se presentou a recomendación do Departamento de Defensa que será enviada ao Congreso para que valore a súa aprobación.
Para iso, ademais, segundo dixo o vicepresidente, o Goberno deu instrucións ao Capitolio para que destine 8.000 millóns de dólares nos próximos anos, co obxectivo de que esta nova rama do Exército, que será a sexta das Forzas Armadas Estados Unidos, poida estar operativa no ano 2020.
Esta iniciativa foi presentada polo presidente, Donald Trump, meses atrás co fin de garantir o "dominio" estadounidense do cosmos e contrarrestar os avances de China e Rusia.
O cuarto paso, sería nomear a un novo subsecretario de Defensa para o Espazo, que sería un civil cuxa tarefa sería garantir que se cumpren "os prazos e obxectivos" marcados
O documento establece catro puntos a seguir para tal fin. O primeiro sería a creación do Comando do Espazo, que será en última instancia o aparello responsable deste novo Exército.
En segundo lugar, comezaríase a traballar na formación das tropas que procederán das distintas ramas do Exército e cuxa misión será centrarse na seguridade espacial.
Estableceríase, ademais, unha Axencia Espacial cuxa obxectivo sería "a investigación e innovación" para dotar ao Pentágono de todos os recursos necesarios para levar a cabo esta nova misión.
E para rematar, o cuarto paso, sería nomear a un novo subsecretario de Defensa para o Espazo, que sería un civil cuxa tarefa sería garantir que se cumpren "os prazos e obxectivos" marcados.
"Os nosos adversarios transformaron xa o espazo nun novo campo de batalla", xustificou Pence, quen puxo como exemplo a destrución por parte de China dun dos seus propios satélites cun mísil ou o desenvolvemento dun láser capaz de bloquear ás infraestruturas espaciais por parte de Rusia.
O secretario de Defensa, James Mattis, quen tamén participou no acto, coincidiu co vicepresidente na necesidade de garantir a "capacidade disuasoria" de EE.UU. no espazo por tratarse dun escenario vital para os intereses do país.