Un laboratorio británico ofrece 4.000 euros por contaxiarse de coronavirus

Un laboratorio británico ofrece 3.500 libras (uns 4.000 euros) aos voluntarios que se deixen contaxiar cun tipo de coronavirus nunhas probas clínicas para tratar de achar unha vacina contra o covid-19, segundo informaron os medios locais. Hvivo, situada no leste de Londres, é unha da vintena de empresas e organizacións públicas do mundo que intentan atopar un antídoto ao virus, nun proxecto valorado globalmente en máis de 2.000 millóns de dólares, indicou The Times.

Segundo o xornal, nas probas británicas, que levarán a cabo unha vez obtidas as autorizacións regulatorias pertinentes, 24 voluntarios serán inxectados con dúas cepas de coronavirus máis débiles que o covid-19 (0C43 e 229E) e illados durante dúas semanas.

Os voluntarios permanecerían en corentena no laboratorio de Hvivo no Queen Mary BioEnterprises Innovation Centre, onde os expertos vixiarían os seus síntomas, parecidos aos dun catarro, e administraríanlles novos antivirais para probar a súa eficacia. Estarán, ademais, sometidos a exames cardíacos, de ouriños e sangue, e tomaráselles a temperatura regularmente.

Segundo os medios, o obxectivo é desenvolver unha vacina que poida ofrecerse á xente maior e vulnerable o próximo inverno, posto que é improbable que se consiga un antídoto no futuro inmediato. A empresa, Hvivo, está especializada en virus e dedícase a dar servizos de probas e laboratorios. De acordo co diario británico The Sun, estivo recrutando voluntarios para o experimento, de dimensións globais.