A OMS lamenta o cesamento de achegas por parte de Estados Unidos ao organismo
O director xeral da Organización Mundial da Saúde (OMS), Tedros Adhanom Ghebreyesus, lamentou este mércores a decisión do presidente estadounidense Donald Trump de deter as achegas dese país ao organismo, aínda que sinalou que espera que iso non impida a loita global contra o Covid-19.
"Lamentamos a decisión de Trump cara a unha organización que traballou pola saúde dos máis pobres e vulnerables do mundo", subliñou o investigador etíope en rolda de prensa.
"Revisaremos o impacto desta retirada no noso financiamento, e traballaremos con outros para intentar encher ese baleiro co fin de garantir que o traballo continúe sen interrupcións", engadiu.
Tedros subliñou que "cando estamos divididos, o virus aprovéitase das gretas que se abren entre nós", e asegurou, fronte ás acusacións de Trump de neglixencia do organismo nas primeiras etapas da pandemia, que a OMS revisará o seu traballo realizado cando a alarma sanitaria termine.
"No seu debido momento, o labor da OMS á hora de atacar esta pandemia será revisada polos países membros e os órganos independentes establecidos para garantir transparencia e toma de responsabilidades", afirmou.
"Sen dúbida, identificaranse áreas susceptibles de mellora, e haberá leccións que aprender, pero por agora o noso foco, o meu foco, é deter o virus e salvar vidas", concluíu.