Prisión sen fianza para os tres detidos por unha violación grupal en Barcelona

O xuíz decretou este luns prisión sen fianza para os tres detidos que agrediron sexualmente unha muller no interior dun coche en Barcelona durante a madrugada do pasado sábado 29 de febreiro, á vez que a gravaban e lle facían fotos cos seus dispositivos móbiles.

O xulgado de instrución 11 de Barcelona acordou a prisión provisional comunicada para estes tres homes, polos delitos de agresión sexual en grupo a vítima vulnerable e por un delito de revelación de segredo.

Os feitos en cuestión ocorreron a madrugada do pasado sábado 29 de febreiro na rúa Casanova de Barcelona, onde os tres detidos, de 33, 32 e 28 anos de idade, de nacionalidades hondureña, ecuatoriana e española, agrediron sexualmente a vítima que, posteriormente, foi atendida nun centro hospitalario.

Foi un peón o que alertou, pouco antes das seis da mañá, a unha patrulla dos Mossos de que no interior dun vehículo estacionado na rúa había tres homes agredindo sexualmente unha muller, que se atopaba nun estado semiinconsciente e á que estaban gravando e facendo fotos.

Axentes da policía catalá presentáronse no lugar apuntado por esta testemuña e detiveron estes tres homes, un dos cales estaba dentro do coche e os outros dous no exterior do mesmo.

Tras activarse o protocolo de agresión sexual, a muller foi atendida nun centro hospitalario e, posteriormente, presentou unha denuncia ante os Mossos. 

Os tres homes pasaran a disposición xudicial este luns, e dous deles acolléronse ao seu dereito a non declarar.