Torra abandona un acto en Washington molesto polo discurso do embaixador español
O presidente de Cataluña tacha de "intolerable" a charla de Morenés por ser "ofensiva cara ao país e a institución"
O presidente da Generalitat de Cataluña, Quim Torra, abandonou este mércores un acto en Washington molesto polo discurso que estaba a facer o embaixador español en EE UU, o exministro de Defensa Pedro Morenés.
O incidente ocorreu este mércores pola noite durante a recepción oficial de inauguración do festival cultural Smithsonian Folklife, no que participa como invitada Cataluña, e á que asistían Torra e Morenés.
Torra foi o primeiro dos dous en tomar a palabra no evento cun discurso no que aludiu á crise política catalá e aos dirixentes independentistas encarcerados.
Acto seguido falou Morenés, momento no que Torra abandonou o acto xunto á delegación que lle acompañaba, molesto co discurso do embaixador español.
Torra considerou o discurso de Morenés "absolutamente intolerable e ofensivo cara ao país (Cataluña) e a institución", segundo publicou en Twitter a súa xefa de prensa, Anna Figuera.
Tamén pediu a dimisión de Morenés e instou o presidente do Goberno, Pedro Sánchez, a responder "se comparte" as palabras do seu embaixador.
"Un discurso no que se nos tacha de mentireiros e que falsea o que pasa en Cataluña", dixo.
Fontes da embaixada española en Estados Unidos non quixeron comentar o incidente, aínda que lamentaron que os medios de comunicación non tivesen acceso ao acto para corroborar o sucedido.