Un traballador dunha aeroliña en EE.UU. rouba un avión e estrélase pouco despois
A aeronave roubada e pouco despois sinistrada, con capacidade para 76 pasaxeiros, ía baleira
Un traballador dunha aeroliña no aeroporto internacional Seattle-Tacoma (Washington, EE.UU.) roubou este venres un avión da compañía aérea Horizon Air, subsidiaria de Alaska Airlines, despegou sen permiso e estrelouse pouco despois, nunha acción suicida, informaron as autoridades.
O avión roubado e pouco despois sinistrado, con capacidade para 76 pasaxeiros, ía baleiro. "Un traballador da aeroliña realizou un despegamento sen autorización en Seattle-Tacoma. A aeronave estrelouse ao sur do estreito de Puget", informou o aeroporto na súa conta oficial de Twitter.
Segundo o Departamento do Xerife do condado de Pierce, o autor do suceso era "un mecánico dunha aeroliña", de 29 anos, que actuou só, e a súa acción non tiña fins terroristas.
Alaska Airlines, compañía irmá de Horizon Air, tamén dixo en Twitter que o avión ía baleiro: "Cremos que non había pasaxeiros nin tripulación a bordo, máis aló da persoa operando o avión".
A aeronave accidentada era un Bombardier Q400, de fabricación canadense.
Medios estadounidenses indicaron que pouco despois de sinalarse o roubo sobre as 20.00 hora local (03.00 do sábado GMT), dous avións militares caza F-15 despegaron desde Portland (Oregón) para interceptalo.
O avión estrelouse uns quince minutos despois de iniciar o seu voo na illa Ketron, entre Tacoma e Olympa, segundo informou o Departamento do Xerife do condado de Pierce.
Un vídeo difundido nas redes sociais mostra o avión roubado facendo piruetas no aire seguido dun dos F-15. "As acrobacias que estaba a facer no aire ou a falta de nocións de voo ocasionaron o accidente", indicou o xerife.