Un turista cae dentro dunha obra de arte nun museo do Porto e acaba hospitalizado
A escultura Baixada ao limbo está formada por un foso de 2,5 metros de profundidade
Un visitante italiano foi hospitalizado por caer na escultura Baixada ao limbo do artista contemporáneo Anish Kapoor, exposta no museo Serralves do Porto, segundo informa o Diário de Notícias de Portugal.
O home, de case 60 anos, sufriu varias feridas tras o accidente e atópase ingresado no hospital de San Antonio. A obra en cuestión está formada por un foso de 2,5 metros de profundidade e, segundo fontes do museo recollidas polo citado periódico, está a ser "intervida" e volverá reabrirse ao público.
O museo anunciou que, a pesar de que se tomaron as medidas de seguridade protocolarias, a dirección do museo decidiu reforzalas, aumentando a dimensión da sinalización visual da escultura, co fin de diminuír os riscos. Polo momento, a zona na que se atopa a obra está illada.
Baixada ao limbo é a peza máis antiga da mostra Anish Kapoor: Obras, Pensamentos Experiencias, organizada en cooperación coa Fundación Bancaria La Caixa, e que conta con catro grandes traballos do escultor británico distribuídas polo Parque Serralves, a nunca antes exposta A linguaxe dos paxaros, e 56 maquetas concibidas polo artista ao longo dos últimos 40 anos. A mostra permanecerá no museo ata xaneiro de 2019.
O título da escultura inspírase nunha obra homónima do pintor renascentista Andrea Mantegna que xorde do interese do artista "polo xogo formal e metafórico entre luz e escuridade, interior e exterior, o contido e o infinito".