O FIV de Vilalba colga o cartel de 'non hai billetes'
O festival esgota todos os seus abonos e entradas de día por terceiro ano consecutivo
O FIV de Vilalba anunciou este martes que esgotou todas as súas entradas de día para a edición do festival que terá lugar o 27 e o 28 de abril na localidade chairega.
A organización xa informara hai uns días de que os abonos xerais estaban esgotados, polo que agora xa pode colgar o cartel de non hai billetes. É o terceiro ano consecutivo que o FIV consegue este logro.
Este ano forman parte do cartel artistas como Lori Meyers, Xoel López, Novidades Carminha, La habitación roja, Carlos Sadness, Shinova, Nunatak, Escoitando Elefantes, Postergel, David Kano DJ, Oscarmina DJ ou a Banda de Música de Vilalba. Ademais, haberá un grupo sorpresa no Concerto Mahou Cinco Estrelas.