Pepe Bordallo e Quique Alvarado, galardóns honoríficos dos Premios Martín Códax da Música
A entrega dos galardóns terá lugar o 9 de maio no Pazo da Cultura de Pontevedra
Os baixistas Pepe Bordallo e Quique Alvarado foron recoñecidos co galardón honorífico ex aequo dos Premios Martín Códax da Música, que se entregarán o 9 de maio no Pazo da Cultura de Pontevedra. Así o anunciou este venres o portavoz da Asociación de Músicos ao Vivo, Ramón Bermejo, que destaca que ambos "tocaron en infinidade de formacións de todo tipo e tamén formaron a multitude de músicos durante décadas".
"Queremos render homenaxe con eles a eses músicos todoterreo, xenerosos, que sempre o dan todo co mellor sorriso e inmenso talento", apuntou Ramón Bermejo durante a rolda de prensa da V edición destes premios. A gala desta edición estará conducida polo actor Carlos Branco e o humorista gráfico Luís Davila. En total, entregaranse 57 premios nunha edición na que se presentaron 449 candidaturas a 15 categorías.
Entregaranse 57 premios tras unha quinta edición á que se presentaron case medio milleiro de candidaturas
ADMINISTRACIÓNS. Pola súa banda, a concelleira de Cultura de Pontevedra, Carme Fouces, expresou o orgullo e alegría pola chegada desta quinta edición. Remarca que ademais de ser un día de festa para a música galega trátase tamén dun día de reivindicación e un momento para: "Recoller os sinais de identidade da nosa terra".
Pola súa banda, o deputado de Cultura e Lingua na Deputación de Pontevedra, Xosé Leal, destaca que Galicia é "unha potencia musical" e reinvindica que "calquera iniciativa relacionada coa música en galego debe seguir tendendo á profesionalización". Na súa intervención, o director da Agadic, Jacobo Sutil, sitúa o apoio da Xunta de Galicia á organización destes premios como peza fundamental para incentivar a creatividade e a profesionalidade no sector musical.
Sutil recoñece tamén o valor que conseguen estes galardóns, pois "prestan á cidadanía un instrumento de difusión moi relevante para un maior coñecemento de todos os estilos, variedades e calidades da música galega de hoxe en día", asegura.
A GALA. A dirección da gala estará un ano mais coordinada por Iria Pinheiro, quen pretende configurar o evento ao estilo dun late night show televisivo conducido polo actor e monologuista Carlos Branco e o debuxante Luís Davila, quen estarán acompañados por unha banda basee configurada por numerosos músicos que transitarán polo escenario.
A presentación dos Premios realizarase no marco dunha exposición de instrumentos medievais especialmente creada para o evento polos artesáns do Centrade de Lugo, esta exposición poderá apreciarse no vestíbulo do Pazo dá Cultura de Pontevedra nos días previos e no mesmo día da gala os lutiers do Centrade farán unha demostración da sonoridad de tan antigos instrumentos.