O público de 'OT' elixe favorita a Sabela
A concursante pontesa sálvase da nominación tras unha actuación que non foi das mellores da noite
Logo de tres semanas entre os máis votados, Sabela Ramil converteuse este mércores en favorita do público de Operación Triunfo 2018 tras superar en apoios a Julia e Alba —as outras dúas concursantes máis votadas—.
A elección como favorita chegou nun bo momento para Sabela. A pontesa continúa polo menos dúas semanas máis no concurso, salvándose automaticamente da nominación tras unha actuación que a puido poñer na corda frouxa. De feito a valoración do xurado non foi do todo positiva para a galega. "Hoxe non foi a túa mellor noite, estabas máis insegura, posiblemente polos problemas que tiveches na voz", afirmou Ana Torroja, quen, con todo, valorou a súa evolución dentro do programa. "A túa traxectoria foi in crescendo. Iso o público veo e nós tamén", dixo.
EXPULSIÓN E NOMINADOS. Carlos Right foi o concursante expulsado na Gala 8. Marilia, que conseguiu un 57% dos votos da audiencia para continuar na academia volve estar nominada —por terceira semana consecutiva— e enfrontarase, xunto a Marta, á expulsión o vindeiro mércores.
O xurado tamén propuxo para abandonar a academia a Famous e María. O primeiro foi salvado polos profesores, mentres que os compañeiros elixiron á madrileña para continuar na academia.