Vidal asegura que fichou polo Barça "para gañar a Champions"

Tras gañar dúas Ligas en Chile (Colo-Colo) e sete en Europa (tres co Juventus e catro co Bayern), o chileno Arturo Vidal asegurou este luns pola tarde que fichou polo FC Barcelona "para gañar a liga de Campións", e engadiu que este trofeo "é unha conta pendente" que ten aínda. O xogador suramericano superou as probas médicas e, tras asinar o contrato para os próximos tres anos, atendeu aos medios informativos no Auditori 1899, próximo ao Camp Nou, onde o internacional chileno estivo acompañado en todo momento polo seu fillo Alonso, de oito anos.

O terceiro chileno que viste a zamarra do FC Barcelona, tras o porteiro Claudio Bravo e o atacante Alexis Sánchez, salientou ante os informadores a súa ansia por lograr a Champions, competición que nunca obtivo, e que cando xogou unha final, no 2015 coa Juventus, perdeuna ante o Barcelona (3-1). "A verdade é que estou moi feliz, por fichar polo mellor equipo do mundo. Veño con fame de gañar moitas cousas. Coa mellor enerxía e corazón para deixalo todo na cancha", arrincou a súa declaración o chileno.

"Este pode ser o meu ano e oxalá sexan tres Champions nas tres tempadas que estarei aquí. Quero darlle moitas alegrías á xente do Barcelona", engadiu.

Arturo Vidal estivo acompañado na mesa ante os informadores polo secretario técnico, Eric Abidal, e polo vicepresidente Jordi Mestre, quen se negou a dar información sobre as cantidades abonadas polo Barcelona ao Bayern de Múnic no traspaso "por petición expresa" da entidade alemá. No entanto, informou de que o contrato é por tres anos e que terá unha cláusula de rescisión de contrato de 300 millóns de euros. De forma extraoficial, deuse a coñecer que o traspaso foi por 19 millóns de euros.

Vidal, que vén de xogar nun grande como é o Bayern, asegurou que a súa fichaxe polo Barcelona "é subir un chanzo máis respecto do Bayern".

Da súa última operación no xeonllo dereito, que o mantivo de baixa catro meses, o internacional chileno asegurou que se atopa ben e que está dispoñible para adestrarse e xogar. "Fisicamente, estou en forma", garantiu. Sobre o estilo de xogo dos barcelonistas e do adn azulgrana e se encaixará nel, Vidal respondeu o seguinte: "Teño a mesma mentalidade que os xogadores que están aquí. O mellor é levantar copas, aquí e en todo o mundo".

Sorprendeuse cando lle preguntaron se se sentía antimadridista, por algúns piques que tivo vestido do Bayern con xogadores do Madrid. Negou que sexa antimadridista e si que asegurou que a partir de agora "todos os equipos contra os que xogue o Barcelona serán os meus rivais", sen facer ningunha distinción. "Eu non teño ningunha conta pendente co Madrid, senón que teño unha conta pendente con gañar a Champions e espero lograla co mellor equipo do mundo", subliñou.

Rememorou que cando tiña catorce ou quince anos "prometinme esforzarme para ser un dos mellores cando vin entrar morta de cansazo á miña nai cando chegou do traballo. Agora, creo que estou no máis alto do mundo". "Estou aquí para achegar moito ao equipo, pero terá que falar co adestrador para saber que quere de min. Estou contento co novo desafío e por gañar moitos títulos", dixo Arturo Vidal, que se mostrou moi risueño pero parco en expresións, repetindo constantemente que o seu maior obxectivo é esforzarse polo equipo, lograr título e, entre eles, a Champions.

Dixo tamén que tras xogar contra Messi e gañarlle en dúas finais da Copa América, agora xunto a el "terei que estar á altura con el e cos mellores xogadores do mundo". Finalmente, insistiu en que está "ben" do seu xeonllo dereito e recordou que cando o seu representante lle puxo encima da mesa as opcións que había para saír do Bayern, cando viu que unha era a do Barcelona "non dubidei en poder estar no mellor equipo do mundo".