Hamilton reforza o seu liderado ao gañar por quinta vez en Hungría
O segundo e terceiro posto corresponderon aos dous pilotos de Ferrari, o alemán Sebastian Vettel e o finlandés Kimi Raikkonen
O inglés Lewis Hamilton (Mercedes) reforzou este domingo o seu liderado no Mundial de Fórmula Un ao gañar, por quinta vez, o Gran Premio de Hungría, no que relegou ao segundo e ao terceiro posto aos dous pilotos de Ferrari, o alemán Sebastian Vettel e o finlandés Kimi Raikkonen.
Hamilton, que logrou na pista das aforas de Budapest a súa sesaxésima sétima vitoria en Fórmula Un, na última carreira antes do parón vacacional, lidera agora o certame con 213 puntos, 24 máis que Vettel.
O australiano Daniel Ricciardo (Red Bull) finalizou en cuarta posición unha proba calorosa na que os españois Fernando Alonso (McLaren) e Carlos Sainz (Renault) foron oitavo e noveno, respectivamente.
O finlandés Valtteri Bottas, compañeiro de Hamilton en Mercedes, foi quinto, por diante do francés Pierre Gasly, que completou unha boa actuación co seu Toro Rosso; mentres que o danés Kevin Magnussen (Haas) acabou en sétima posición, xusto por diante do dobre campión mundial asturiano de F1, que este domingo festexou no Hungaroring, o escenario do primeiro dos seus 32 triunfos (en 2003), o seu trixésimo sétimo aniversario.
Tamén entrou nos puntos, ao cruzar a meta por detrás de Sainz, o francés Romain Grosjean (Haas), que concluíu a carreira en décima posición.
A próxima proba, o Gran Premio de Bélxica o décimo terceiro do Mundial, disputarase a última fin de semana de agosto no circuíto de Spa-Francorchamps.