Os 3,5 millóns de empregados públicos que hai en España —dos cales uns 193.900 están en Galicia— cobrarán a partir de outubro un 0,5% máis para compensar a desviación da inflación. A mellora retributiva, que terá efecto retroactivo desde xaneiro e que alcanza ao cadro de persoal do Estado, as autonomías e a administración local, é o resultado do acordo selado en outubro de 2022 entre os sindicatos CC.OO. e UXT e o Goberno.
O pacto incluíu unha alza do 3,5% en 2022, ao que seguiría unha subida fixa do 2,5% este ano. A maiores, contemplábase un alza extra en 2023 de medio punto vinculada ao índice de prezos de consumo harmonizado (IPCA) de setembro do exercicio en curso, que acabou no 3,2% segundo o indicador adiantado. En base ao convido, se a suma deste dato co IPCA de decembro de 2022 (5,5%) superaba os seis puntos, a mellora salarial adicional debería facerse efectiva desde outubro.
E podería non ser o único incremento, pois para este ano está prevista unha alza adicional doutro medio punto se o PIB nominal crece por encima do 2,1% previsto polo Goberno para o conxunto do ano. Este plus tamén ten opcións de materializarse, pois o Executivo, o Banco de España e outros organismos internacionais revisaron á alza as súas proxeccións de crecemento para España.
Para o próximo exercicio, os empregados públicos teñen garantido un incremento fixo do 2%, máis unha mellora adicional e consolidable de medio punto en función da variación do IPCA de 2022, 2023 e 2024.