Paixón polo que fan, prudencia, tesón e moita ilusión por seguir medrando paseniño. É o que transmite Álex Moure nunha conversa na que repasa a traxectoria de Kalekói, unha marca que conquista cada vez máis padais, entre eles os de chefs con estrela Michelin, e leva recollidos diversos premios.
Imaxinaban en decembro de 2015 cando venderon o primeiro iogur aí pretiño, a nivel local, que Kalekói chegaría a ser o que é hoxe?
Soñabámolo, pero non era doado. Se miramos atrás e vemos todo o camiño percorrido parecía impensable cando comezamos porque puxemos en marcha un proxecto desde cero e nun sector moi maduro como o lácteo. Era complexo, pero creo que soubemos ir a un nicho de mercado diferente e, sobre todo, crear unha marca e unha imaxe. Pouco a pouco, Kalekói empeza a soar e a xente xa nos coñece.
Como foi que decidiron volver ao rural para emprender un proxecto de elaboración de iogur artesanal?
Queriamos estar preto da casa dos nosos pais. A nivel laboral, as posibilidades que pode haber en Lalín non son as mesmas que nunha cidade grande coma Vigo, onde estudamos. Queriamos montar algo pola nosa conta porque, aínda que non estabamos mal nas empresas nas que traballabamos, tiñamos o ‘gusanillo’ de emprender e ser os nosos propios xefes. Así que dándolle voltas a diferentes sectores pensamos na posibilidade de poñer en valor o leite da gandaría dos pais de Susana en Rodeiro.
Por que iogur? É un mercado no que hai moitas marcas e non ten que ser doado facerse un oco.
Aínda que estamos dentro da área de influencia da denominación de orixe Arzúa-Ulloa, lembro que buscando en internet atopamos un mapa coas queixerías que había en Galicia e xa non lle collían máis chinchetas, polo que diferenciarse ía ser moi complicado. Vimos que fóra se vendía un iogur artesán que aquí non había, enfocado sobre todo ás sobremesas. Fomos visitar algún produtor de Castela e León, Asturias, Cantabria e ata Cataluña, onde pode haber oito ou nove proxectos como o de Kalekói. Entón decidimos meternos nisto. Non sabiamos como facer un iogur, só tiñamos idea da parte técnica para fabricalo ou envasalo.
Diferenciarse no mundo do queixo ía ser moi complicado e decantámonos por elaborar un iogur artesanal
Tamén teñen no mercado kéfir e leite fresco pasteurizado, este último creo que por petición popular.
Si. Nos nosos plans non figuraba vender leite. Sempre estivo un pouco demonizado. Pero ao pouco de empezar co iogur xurdiu demanda e comezamos a envasar leite fresco pasteurizado. Ten moitos contras, como unha vida útil xusta ou o transporte, pero tamén algún pro, sobre todo que o consumidor é máis fácil de fidelizar e que probe o iogur ou o kéfir. Axuda a facer marca. En canto ao kéfir, está de moda e conseguimos facer un diferenciado que ten boa aceptación. Nós empezamos en tendas pequenas pero logo vimos que era necesario dar o salto á distribución ou os custos fixos cómente. E unha vez que estás no lineais dunha cadea de supermercados daste conta de que non podes ter só un produto porque apenas se ve. A sección dos iogures é infinita, con moitas cores... a ver como atopas un Kalekói alí no medio!
Están en grandes cadeas de distribución e ábrense novas portas.
Estamos en Gadisa, Vegalsa, Froiz e, a nivel galego, tamén vendemos nas tendas de El Corte Inglés, un vínculo coa compañía que agora se estenderá a nivel nacional. En Asturias vendemos en Alimerka, que tamén ten establecementos en Lugo e Castela e León. Tamén chegamos á illa de Lanzarote a través de Spar. Alí hai moito inglés e en Inglaterra consumen só leite fresco, apenas existe UHT. E seguimos en contacto con outros operadores para continuar dando pasiños.
Os nosos produtos estarán nas tendas de El Corte Inglés a nivel nacional e lanzaremos unha gama de bebibles
Que distingue os iogures Kalekói?
Un dos aspectos diferenciais, que nos axudou a entrar na distribución, é que hai tres anos lanzamos un proxecto de iogures elaborados con leite A2, que é o que producían as vacas en Europa hai centos de anos e o que máis se asemella ao leite materno. Senta mellor ás personas que teñen algunha intolerancia, non alerxias, pero si a quen sente pesadez ou ten unha mala dixestión se toma algo con leite. É pola xenética dos animais. Agora todas as vacas da gandaría son A2A2. Fixemos o primeiro iogur con leite A2 de Galicia para diferenciarnos. Ten o sabor característico do leite, que coidamos moito coa alimentación dos animais. A nosa receita de iogur natural só leva leite e fermentos, nada máis. Ten unha fermentación máis tradicional, máis longa. Por exemplo, a industria fai cada seis horas unha fabricación de iogur, nós fermentamos 10 ou 12 horas. Ademais, é moi lixeiro porque só ten a graxa propia do leite e cremoso pese a non levar natas engadidas. Témolo natural e preparado con froitas. E de cara ao Nadal lanzamos edicións especiais.
Fixemos o primeiro iogur con leite A2 de Galicia. O que o diferencia é que senta mellor e o sabor característico do leite
Que produción teñen agora?
Estaremos transformando unhas 600 toneladas de materia prima en iogur, kéfir e leite fresco pasteurizado, que é a produción dunha gandaría media. Ao mellor este ano un pouquiño máis. Imos crecendo, pero adecuando os
volumes ás vendas que temos.
Cantos conforman o equipo?
Cinco. Estamos Susana e eu e temos tres rapaces con nós. Está todo o máis automatizado posible. A falta
dunha persoa non se pode notar.
Teñen en mente diversificar e facer outros produtos nun futuro?
Nunca se sabe, pero facer outro produto, aínda que sexa a base de leite, require procesos diferentes. A forma de elaborarlos ou procesalos podería prexudicar o que facemos agora. De momento seguiremos co iogur, o kéfir e cunha gama de bebibles coa que estamos a comezar. É mellor profesionalizarse o máximo posible no que sabemos facer ben e saír para dalo a coñecer que queimar cartuchos en mercados moi maduros.
