Renfe cancelou este venres un total de 31 trens en Galicia pola folga de interventores de a bordo convocada por CC OO en toda España. Segundo informan fontes da compañía, a xornada transcorre con "normalidade", xa que hai cumprimento dos servizos mínimos.
Estas cancelacións afectaron de forma xeneralizada á comunidade, tanto no Eixo Atlántico, como o de ida e volta a Barcelona, o tren hotel con Madrid e o Vigo-O Porto, entre outros. Coa súa convocatoria de folga, CC OO busca denunciar a "falta de persoal" que presenta o colectivo de interventores que "fai imposible prestar un servizo de calidade coa seguridade desexable para os viaxeiros".
Segundo asegura o sindicato, o número de trens de Ave e longa distancia que circulan sen interventor a bordo aumentou, de forma que os "viaxeiros pagan por un servizo que non reciben". Para CC OO, esta situación é aínda "máis grave" cando o tren que circula sen interventor é dos considerados de servizo público, isto é, os rexionais ou de media distancia, e que, xa que logo, reciben unha subvención do Estado.
DATOS ESTATAIS. En España, este venres un total de 154 trens dos habitualmente programados víronse afectados pola folga. Os trens que se cancelan por non estar incluídos nos servizos mínimos fixados polo Ministerio de Fomento tendo en conta que a folga se convocou nun día "de excepcional mobilidade de viaxeiros, no que coincide a mobilidade propia dunha xornada laborable coa do inicio dun fin de semana".
