A pesca de sardiña debería reducirse a "cero" en 2019 en España e Portugal pola gran diminución de existencias que houbo nos últimos anos, advirte un informe publicado este venres polo Consello Internacional para a Exploración do Mar (CIEM).
O estudo, do que se fai eco a prensa portuguesa, apunta á falta de biomasa (peixes adultos) como principal argumento para a prohibición da súa captura, xa que a cifra actual é de menos de 0,4 millóns de toneladas, inferior á metade do límite biolóxico de seguridade e que foi retrocedendo de forma continua desde 2006.
Ademais, a cantidade de novos peixes en idade reprodutiva foi en 2017 de menos de 5.000 millóns de toneladas, a cifra máis baixa en máis dunha década.
A prohibición da pesca en 2019 levaría, segundo cálculos dos técnicos, a un aumento do 9,8 % na poboación de sardiñas adultas, un factor chave para asegurar a reprodución da especie e garantir existencias nas costas da península.
O Goberno de Portugal lida contra a escaseza da sardiña desde que o CIEM emitise en outubro pasado un informe no que recomendaba suspender a pesca desa especie en augas ibéricas do Atlántico, xa que as súas existencias atópanse en niveis moi baixos.
O Executivo de Lisboa implantou entón a prohibición total de capturas, manutención a bordo e descarga de sardiñas durante os catro primeiros meses de 2018 para "garantir" a sustentabilidade ambiental, económica e social da pesca portuguesa a longo prazo.
Este ano, os pescadores portugueses teñen un límite de capturas fixado en 9.709 toneladas.
Portugal, considerado o maior consumidor de peixe por habitante da Unión Europea e o terceiro a nivel mundial, ten a sardiña como un dos produtos máis emblemáticos dentro da súa gastronomía.