A posibilidade de peche da factoría mariñá de Alcoa está a amedrentar á sociedade, ata o punto de que os empresarios aprecian unha especie de medo "escénico" entre a poboación, cun parón nas compras "polo que poida pasar". Para o concello no que está radicada a fábrica, a súa clausura suporía practicamente a bancarrota e desde a Federación do Comercio da Mariña (FCAM), o seu presidente, José Carlos Paleo, advirte de que o 40% dos seus 950 asociados acabarían pechando. En xeral, os consultados afirman que "a metade da economía mariñá iría a pique".
"Sería un desastre apocalíptico", chega a afirmar o primeiro edil do municipio xovense, Demetrio Salgueiro. "Un concello de 3.300 habitantes como o noso ten un orzamento que rolda os nove millóns de euros. O 70% do que ingresamos procede do Imposto de Actividades Económicas (IAE) de Alcoa e indirectamente, das liñas eléctricas que o atravesan para a factoría, así que no caso de pechar baixaría como mínimo á metade o volume de ingresos". engade.
Ademais, "a metade da poboación de Xove traballa en Alcoa". De "catástrofe" chega tamén a cualificar Salgueiro ese escenario xa que "moitos deses ingresos destinámolos aos servizos que habería que reestruturar e tamén habería que replantexar o cadro persoal, no que agora temos 86 empregados fixos; algo impensable para un pequeno concello, sen unha empresa solvente detrás". Tampouco poderían efectuar en Xove os investimentos que se están destinando á recuperación patrimonial, a recursos turísticos e ao arranxo de camiños.
Afonso Villares: "Que o Goberno aprobe un venres o decreto pola Mariña, Lugo e Galicia para dar viabilidade aos traballadores de Alcoa"
Entre os servizos quizais impropios para un pequeno concello derivados dos ingresos de Alcoa en Xove, figura por exemplo, a piscina climatizada.
O seu homólogo en Cervo, Afonso Villares, prefire non ver ese lado catastrófico. Admite que os ingresos derivados de Alcoa supoñen un terzo do seu orzamento, ao redor dos sete millóns de euros, que se destinan a gastos de persoal, —o Concello conta cuns 120 traballadores—, a gastos correntes e investimentos, entre outros.
Villares confía en que Alcoa non peche. Se ese fose o caso, a nivel municipal habería que reducir un terzo dos ingresos. "En bancarrota non íamos estar. Para empezar a débeda bancaria é inexistente", matiza. Da poboación activa de Cervo, poida que directa ou indirectamente vivan da factoría unhas 400 ó 500 familias. "É evidente que Alcoa é a industria que sostén á Mariña. É insustituíble. Non se pode pensar nunha alternativa a unha actividade deste calibre", sinala o rexedor cervense. "A súa chegada no seu día foi un boom, ao igual que o sería a súa saída". O peche sería un cambio drástico, pero non un escenario apocalíptico, di. Non quedaría outra que mirar cara a outras oportunidades, a pesar de que agora o paraugas de Alcoa é tan forte que ensombrece outras ideas. Talvez explotar os recursos turísticos e apoiar ao sector primario estarían entre as opcións, obxecta o rexedor, veterinario de profesión.
Para Villares, que desde os cinco anos e ata os seus actuais 49, sempre conviviu coa fábrica, é un agasallo, a nivel laboral, que hai que preservar. Por iso, solicita do Goberno que un deses decretos dos venres sexa "o decreto social para A Mariña, Lugo e Galicia; un decreto que favoreza a viabilidade dous traballadores".
Hai outros recursos na costa, como a madeira e a pesca, pero Alcoa é a industria principal.
Demetrio Salgueiro: "O escenario de peche sería apocalíptico; Xove, que recibe millóns de Alcoa, podería quedar en bancarrota e con paro"
Esta incerteza non só xera inseguridade en bolsa, senón que se aprecia no comercio: "Polo medo ao que poda pasar a xente non consome". O dono do restaurante O Castelo de Cervo prefire por exemplo non facer reformas dada a situación.
O presidente da federación mariñá de comercio, José Carlos Paleo, cre que o peche sería a "pinga que colma o vaso" dunha crise lastrada: "Se xa estamos no límite, sería o empuxón".
SOLUCIóNS. O sobrecusto da enerxía é o problema de raíz. "A produción de aluminio, a electrolise, non pódese facer sen ela: a electricidade é unha materia prima máis para poder xerar aluminio", sinala Salgueiro. Para o rexedor xovense, o Estatuto do Cosumidor Electrointensivo "tiña que incluír unha rama específica para as empresas hiperelectrointensivas". Os consultados fanse eco de que a proposta do Goberno socialista de Sánchez "non cumpre as expectativas e convén modificala, coas alegacións que se están presentando". Recomendan mostrar "sensibilidade, achegando fondos se é necesario".
"Querer ter empresas que produzan, hai que competir a prezos iguais que nos países dáacontorna", porque hai que darse conta, segundo Salgueiro, de que a decisión de peche de Alcoa adoptarase desde Estados Unidos. Con Alcoa, "gañamos emprego e consumo; canta máis actividade, máis ingresos". Sobre se sairá da factura dos consumidores, instan a diferenciar "ao sector do consumidor particular".
