A Asociación Empresarial Galega de Ascensores (Aega) lanzou este mércores un chamamento ante a "falta de man de obra", polo que puxo en valor que o sector oferta postos "estables e de alto nivel formativo".
Tras un 2017 no que se instalaron 1.276 dispositivos, un 2,1% máis nun ano, o sector quere proxectarse como unha saída para os titulados en mantemento electromecánico ou mecatrónica industrial, entre outras disciplinas.
"Queremos facernos visibles para os que non saiban cara a onde enfocar a súa formación e reafirmarnos como unha opción para os que están en activo", recalca a presidenta de Aega, Ángeles Ríos, que constata que a medida que crece o parque de ascensores "maior é a necesidade de man de obra".
Entre este ano e o que vén incorporaranse uns 200 alumnos ao mercado laboral, unha cifra "insuficiente".
