Poñer coto aos traballos en 'B' e velar pola "formación técnica" dos profesionais son dous dos obxectivos que persegue a Consellería de Economía coa creación do rexistro de empresas de fontanería de Galicia e dunha listaxe de instalacións interiores de suministración de auga. A Xunta acaba de sacar a información pública o proxecto de decreto, de tal forma que poderán presentarse suxestións ata o 24 de maio.
A idea é que a inscrición teña carácter "voluntario", do mesmo xeito que o rexistro de obras en inmobles. Economía sostén que con estes instrumentos se poderá "verificar que as empresas cumpren unha serie de requisitos que garantan a calidade e capacidade técnica do seu servizo", ademais de velar por que paguen os seus impostos e as cotas á Seguridade Social. A maiores, estas ferramentas permitirán velar por que o fontaneiro teña "capacidade para facer fronte ás posibles esixencias de responsabilidade civil" se unha deficiencia causa danos nun edificio.
A falta de datos máis precisos, o directorio de empresas do Ige apunta que en 2017 un total de 5.992 empresas operaban nos ramos da fontanería ou as instalacións eléctricas, das cales 3.279 eran xestionadas por autónomos. "A economía sumerxida creceu exponencialmente como consecuencia da liberalización, que supuxo un drástico cambio nun sector tradicionalmente regulado", constata a Xunta en alusión á aplicación dunha directiva europea de 2006, que en España supuxo eliminar os carnés profesionais.
Para inscribirse no rexistro, sociedades e autónomos presentarán ante a consellería documentos que proben o alta no imposto de actividades económicas, na Seguridade Social e a contratación dun seguro de responsabilidade civil para cubrir posibles danos por valor de 300.000 "euros por sinistro e total anual, con cobertura de post traballos por catro anos". A isto súmanse outros requisitos como un seguro de accidentes para o persoal e o rexistro "nun prazo máximo de dez días dende a súa posta en servizo das instalacións de subministración de auga". O cumprimento destas esixencias dará acceso " marca de calidade Qfegafón auga".
