Os baróns do PP, favorables a apoiar unha última prórroga do estado de alarma
Os principais presidentes autonómicos do PP apostan por aceptar unha última prórroga do estado de alarma, ata case finais de maio, fronte á postura da dirección nacional de partido, manifestada onte polo seu líder, Pablo Casado, de non "apoiar" a aprobación este mércores deste novo decreto do Goberno.
Tanto o presidente galego, Alberto Núñez Feijóo, como a presidenta da Comunidade de Madrid, Isabel Díaz Ayuso, manifestáronse nas últimas horas neste sentido, e tamén a Xunta de Andalucía, que preside Juanma Moreno, sitúa no seu plan de desescalada a fin do estado de alarma para finais deste mes.
Núñez Feijóo admitiu que o Goberno pode que "necesite tempo para organizarse", algo que considera que é "máis entendible" que os argumentos que ofrece en público
Mentres a postura pública de Xénova é a que se move entre o non e a abstención á prórroga do estado da alarma, que se vota mañá no Congreso, as opinións destes baróns rexionais abren a porta a que o PP actúe finalmente como nos debates dos decretos anteriores.
Nas prórrogas previas do estado de alarma, iniciado o pasado 14 de marzo, Casado sempre votou a favor aínda que con reiteradas advertencias ao Goberno para que rectificase a súa xestión ante a crise polo coronavirus e puntualizando que o seu apoio tería unha data límite.
Para Ayuso poderíase dar ao Goberno "os últimos quince días" para manter o estado de alarma e que a saída da poboación se produza "coas mellores garantías" da situación actual de confinamento, aínda que insistiu en que este estado excepcional debe acabar "canto antes" para que se reactive a economía.
A presidenta madrileña apostou por artellar medidas que conxuguen "saúde e economía", para o que sostén que o Estado ten medidas como as leis de saúde pública de 1986 e 2011.
Pola súa banda, Núñez Feijóo admitiu que o Goberno pode que "necesite tempo para organizarse", algo que considera que é "máis entendible" que as razóns que expuxeron publicamente ata agora para prorrogar o estado de alarma.
Neste sentido, Ayuso coincidiu en criticar que o Executivo ameace coa "prórroga ou o caos", cando considera que o vivido en España durante esta pandemia xa o foi, á vez que resaltou que tiveron 45 días para organizar "unha saída con seguridade" e non o fixeron.
Nuñez Feijóo, tras recibir unha chamada da vicepresidenta do Goberno, Carmen Calvo, para informalo sobre a situación destacou, a través dunha mensaxe na súa conta de Facebook, que "o primeiro é a saúde e non hai que deixar de actuar" pero advertiu que non se pode prolongar "sine die" o estado de alarma.
Desde Andalucía, outra das comunidades gobernadas polo PP, o plan de desescalada deseñado polo Goberno de Juanma Moreno, reclama que o estado de alarma "non se prolongue máis aló de finais de maio ou principios de xuño", o que aínda deixaría marxe polo menos para unha prórroga máis, tras a actual que finaliza o 10 de maio.