O responsable de varias oficinas da aseguradora Mapfre na cidade de Pontevedra aceptou unha condena de tres anos e medio de prisión por quedar o diñeiro de máis de 30 dos seus clientes. A sección cuarta da Audiencia Provincial resolveu este xoves mediante un acordo de conformidade o xuízo contra este home polos delitos de falsidade en documento mercantil e apropiación indebida.
A Fiscalía pedía inicialmente cinco anos de cárcere para o acusado e unha multa de doce meses cunha cota diaria de 10 euros. En virtude do acordo alcanzado antes da celebración da vista oral o acusado recoñeceu a autoría dos feitos e aceptou unha condena de tres anos e seis meses, ademais dunha multa de 10 meses cunha cota diaria de 6 euros que en caso de falta de pagamento será conmutada por un día de privación de liberdade por cada dúas cotas non abonadas.
Como indemnización, o acusado deberá abonar á firma para a que traballaba a cantidade de 66.228,93 euros e outros 4.475 a unha das mulleres que estafou. Mapfre xa resolveu a cuestión económica ao indemnizar aos prexudicados e esta muller preferiu presentarse no tribunal pola súa conta para defender o seu caso.
Segundo o escrito de acusación da Fiscalía, entre novembro de 2007 e decembro de 2013, este home, "movido pola intención de obter un beneficio económico e aproveitando a facilidade que lle reportaba o seu cargo para ter acceso á documentación das entidades e a depositada polos clientes", apropiouse do diñeiro de máis de 30 clientes chegando incluso a imitar as súas firmas.
En virtude da súa confesión, considéranse feitos probados, que o acusado realizou reembolsos a contas bancarias a nome da súa esposa e da súa filla, modificou os pagos de primas e usou documentación que tiña á súa disposición sen a autorización dos titulares. A sentenza é firme e contra ela non cabe recurso.
