O dispositivo de extinción do incendio que afectou nas últimas horas ao municipio coruñés de Toques achou o cadáver dun home calcinado nun coche na zona do lume, informaron fontes oficiais. A Garda Civil iniciou unha investigación sobre as causas da morte, co fin de determinar se o falecemento é previo ao incendio ou se produciu a consecuencia do mesmo.
Así mesmo, practicaránselle as probas de ADN para determinar a súa identidade dado que, a consecuencia das lapas, é irrecoñecible. O cadáver apareceu no seu coche nunha pista forestal.
A Consellería do Medio Rural informou á primeira hora da mañá deste xoves deste incendio na parroquia de Capela, no concello coruñés de Toques, que queimou, segundo estimacións provisionais, 35 hectáreas, e que xa foi extinguido.