A Dirección Xeral de Emerxencias e Interior da Xunta activou a alerta de nivel laranxa por un temporal costeiro que comezará na tarde deste mércores e que afectará a todo o litoral galego.
Segundo a información da Axencia Estatal de Meteoroloxía (Aemet), o nivel laranxa empezará na tarde do mércores no litoral oeste da Coruña. Durante a madrugada do xoves, estenderase ao suroeste da mesma provincia, así como a Pontevedra e Lugo, xa nas primeiras horas da mañá, chegará á zona noroeste da Coruña. En todos os casos, espérase mar combinada do oeste con ondas de 5 a 6 metros.
Por mor deste temporal, a Xunta aconsella a suspensión das actividades pesqueiras e marisqueiras como medida preventiva naquelas zonas máis perigosas. Tamén se recomenda que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.
Tamén os peiraos constitúen espazos de risco ante a alerta por fenómenos meteorolóxicos adversos. Nestas contornas, débense evitar os percorridos polas instalacións portuarias, en especial en zonas de especial perigo como diques de abrigo, diques, escaleiras de acceso aos diques e peiraos, entre outros. Do mesmo xeito, débense evitar percorridos en vehículos preto dos peiraos, así como aparcar nos portos, na medida do posible.
Emerxencias recorda, ademais, que é recomendable non pasear preto dos bordos litorais, paseos marítimos e zonas próximas ao mar. Tamén se recomenda non camiñar polas proximidades dos edificios portuarios, guindastres ou outras edificacións que, polas súas características construtivas, poidan sufrir desprendementos nas súas estruturas exteriores, talles como cubertas metálicas.
NEVE A MIL METROS. Despois do paso da fronte, chegará o aire frío polo oeste de Galicia, achegando moita inestabilidade. Así, este xoves espéranse choivas en toda a comunidade, que poderán estar acompañadas de saraiba e aparello eléctrico. Mentres, a cota de neve situarase nos mil metros durante o día, subindo aos 1.300 metros.
Segundo a previsión de Meteogalicia. O vento soprará do noroeste, forte no litoral. Pola súa banda, as temperaturas máximas subirán ata os 14 graos na Coruña e Ferrol, mentres que os valores mínimos descenderán ata os 4 graos en Lugo.
