Afundación de Abanca, como entidade titular da plataforma de venda de localidades Ataquilla.com anticipará a totalidade dos importes necesarios para que as persoas afectadas pola cancelación do Maestral Music Festival poidan recuperar o seu diñeiro.
Segundo informou este xoves, Afundación adoptou esta decisión despois de que o organizador do festival, Get Up Comunicación, S.L., non ingresase no prazo establecido as cantidades necesarias para facer fronte ao reembolso do importe total das entradas, tal e como anunciara no seu comunicado de cancelación.
Así pois, unha vez anticipado o diñeiro, será Afundación quen se encargue de reclamarllo ao organizador.
FRACASO. O Maestral, que se anunciou como o gran evento do verán con 20 días consecutivos de concertos, entre o 3 e o 23 de agosto, viuse obrigado cancelar un total de 15 eventos, dous deles gratuítos, a causa do forte temporal e os ventos que sacudiron as Rías Baixas.
En consecuencia, preto de 6.000 espectadores que adquirira as súas localidades víronse afectados.
Segundo Afundación, o proceso de devolución iniciarase hoxe mesmo e está previsto que finalice nun prazo máximo de 10 días hábiles.
O importe das entradas será abonado aos compradores a través do mesmo medio de pago empregado para a compra.
As persoas afectadas poden dirixirse a Ataquilla, ante calquera dúbida ou incidencia, a través do mail [email protected] ou no teléfono 902 504 500.