Alfredo Llano, reelixido alcalde de Burela
Alfredo Llano é, desde as doce e dez da mañá deste sábado, o novo alcalde de Burela, ao ser o representante da lista máis votada das pasadas eleccións e non alcanzarse unha maioría absoluta. Contou cos votos de cinco dos seis edís —non acudiu por causa xustificada á investidura Ramiro Fernández Rei— do seu grupo, o PSOE.
Con iso, Burela deixa de ser o único concello de Galicia en funcións, xa que houbo que repetir as eleccións locais de maio o pasado 17 de novembro nunha das mesas do termo municipal.
Llano repite así mandato, aínda que esta vez sen maioría absoluta e coa dúbida aínda de se o BNG, con tres edís, entrará no goberno, xa que as negociacións emprendidas entre ambas as formacións non frutificaron polo momento, aínda que seguirán os próximos días, pois a lei marca o prazo dun mes para o pleno de constitución.
A nova lexislatura de Alfredo Llano como alcalde coincide coa celebración o ano próximo dos 25 anos de Burela como concello, tras a escisión en 1995 de Cervo.