A Asociación Animalista Libera e a Fundación Franz Weber piden regular as Rapas das Bestas
Foron presentadas 150.000 firmas co obxectivo de crear un decreto que achegue "medidas de benestar, protección e transporte do gando equino" durante as celebracións
A Asociación Animalista Libera e a Fundación Franz Weber e case 150.000 firmas reclamaron este sábado un decreto para regular as Rapas das Bestas.
Demandaron, xunto ás rúbricas recollidas na plataforma Change.org, que a Xunta de Galicia "elabore un Decreto lexislativo que poida incluír medidas de benestar, protección e transporte do gando equino durante as Rapas", informan nun comunicado.
Recordan que as Rapas das Bestas, unha arraigada festa galega que consiste en cortar as crines dos cabalos, "non ten ningún modelo de xestión nin de regulación que permita expor as mínimas esixencias de benestar para os cabalos explotados nos curros —recintos nos que se celebra—".
"A falta dunha normativa específica provoca imaxes desagradables, así como un trato inadecuado e cruel dos équidos en non poucas ocasións, ademais de posibilitar a pervivencia de marcaxes dolorosas, como o ferro a lume, cando xa son innecesarios ao existir un método específico: O microchip transpondedor", engaden.