A Audiencia Provincial da Coruña iniciou este mércores a execución da sentenza sobre responsabilidade civil do afundimento do petroleiro Prestige en 2002, que deixou unha marea negra que afectou as costas españolas, portuguesas e francesas, tras un auto de aclaración por parte do Tribunal Supremo.
Nun comunicado, o Tribunal Superior de Xustiza de Galicia (TSXG) precisa que a Audiencia da Coruña xa notificou a decisión ao capitán do buque, o capitán grego Apostolos Mangouras, e ao Fondo de Indemnización da obrigación de abonar as contías requiridas.
O capitán do buque foi requirido a pagar voluntariamente pola súa responsabilidade civil e un 30% adicional do cálculo prudencial de intereses e costas xudiciais. "Ante a previsible insuficiencia de bens do responsable principal, o tribunal realizou o mesmo requirimento á propietaria do barco Mare Shipping, como responsable civil subsidiaria", indica o TSXG.
O fallo tamén foi notificado á aseguradora The London Owners Mutual Insurance Association para que pague "ata o límite da póliza subscrita" nun prazo de vinte días, o mesmo esixido ao capitán e, subsidiariamente, á naviera.
Para rematar, o Fondo de Indemnización de Danos Debidos a Contaminación por Hidrocarburos deberá abonar nese mesmo prazo a cantidade correspondente aos límites establecidos no convenio que o regula, descontadas as sumas xa pagas, segundo a notificación xudicial.
Contra a resolución da Audiencia da Coruña cabe interpor un recurso de súplica, que tería que ser presentado nun prazo de tres días.
Dez anos despois comezou o xuízo na Audiencia da Coruña, que condenou unicamente ao capitán Mangouras a nove meses de prisión por un delito de desobediencia grave á autoridade, tras o que se presentaron unha ducia de recursos ante o Tribunal Supremo, que corrixiu a sentenza e condenouno a dous anos de cárcere por un delito imprudente contra o medioambiente.
O capitán, a operadora do barco e a aseguradora, Universe Maritime e London P&I Club, foron así condenados ao pago da responsabilidade civil.