O avogado encargado de negociar o despedimento do exdirector xerente da Fundación Camilo José Cela expuxo este mércores que mantivo as conversacións para xestionar este trámite coñecedor de que outros cesamentos similares foran anulados en instancias xudiciais por improcedentes. O laboralista que negociou en nome de Tomás Cavanna compareceu como testemuña este mércores pola mañá na terceira sesión do xuízo que deberá determinar se se cometeu un delito de malversación de fondos públicos na fundación que preserva o legado do Nobel galego durante os trámites para convertela en pública no ano 2010.
Por este caso pídense penas de cárcere de catro anos e medio e outros oito anos de inhabilitación especial para catro acusados, entre os que se atopan a viúva do literato galego, Marina Castaño; o propio exdirector xerente da Fundación, Tomás Cavanna; o exconselleiro nos gobernos de Manuel Fraga Dositeo Rodríguez; e a súa filla Covadonga Rodríguez.
O que fose avogado de Cavanna manifestou que o outrora director "quería quedar na fundación", pero que o seu elevado soldo resultou ser un impedimento para a asunción da mesma por parte da Xunta, ademais de que non compartía esta decisión de pasar a patrimonio público. Por este motivo comezouse unha negociación na que o exdirector xerente demandaba unha indemnización por despedimento nas mesmas condiciones que o resto de traballadores da empresa e por unha cantidade "intermedia" ente o despedimento procedente —96.000 euros— e o improcedente —máis de 200.000 euros—.
Únicamente faltan por abordar as probas periciais e documentais
Outros despedimentos anteriores —precisou o laboralista— na fundación foran anulados por, ademais de vulnerar as liberdades sindicais, entender os tribunais que a entidade dispuña de solvencia "suficiente" para saír da encrucillada económica que afrontaba e que motivaba estes cesamentos.
O avogado de Cavanna xustificou así que a Fundación Camilo José Cela e o exdirector pactasen unha cantidade para a súa saída, a pesar de que a Fiscalía ve neste feito un intento de simular un despedimento que non era tal para lucrarse indebidamente antes da asunción da entidade por parte da Xunta.
Este foi o testemuño máis relevante dunha xornada na que as defensas volveron a renunciar a varios das súas testemuñas, entre eles o exconselleiro de Cultura Ricardo Varela ou o exalcalde de Padrón Camilo Forján, o que acelerou a conclusión dun proceso do que unicamente faltan por abordar as probas periciais e documentais.
Este mércores pola mañá tamén acudiu como testemuña á sección sexta da Audiencia Provincial da Coruña, con sede en Santiago de Compostela, onde se celebra o xuízo, un dos patróns da fundación a día de hoxe, que sinalou que o despedimento de Cavanna non foi obxecto de discusión nas reunións celebradas nos últimos anos.
