Os axentes forestais e ambientais manifestáronse este xoves en Santiago, durante o segundo día de folga, e aseguraron que a Xunta "obrígaos" a convertela en indefinida a partir do 1 de agosto porque "non atende" á súa demanda de asinar un novo acordo laboral, cando o de 2004 caducou en 2007.
Reivindican que o novo documento reduza as quendas de 12 horas, permita realizar unha segunda actividade, recoñeza as enfermidades profesionais e aumente o persoal. Así o informaron os representantes de CIG José Manuel Couselo e de UXT José Martín López Vázquez, que congregou a máis dun centenar de traballadores (uns 270 segundo os organizadores) baixo o lema En folga por unhas condicións de traballo dignas, desde a Consellería de Medio Ambiente ata a de Medio Rural.
Prevén que a folga indefinida, que se iniciará o 1 de agosto en caso de non chegar a un acordo coa Administración autonómica, recordou Couselo, conte cunha afluencia do 85% dos axentes ambientais e do 100% dos de medio rural, segundo os seus cálculos. Este é o dato de seguimento que estimaron para a primeira xornada de folga, este mércores, e supón, no caso dos axentes forestais, que secunden a folga os que estean de garda, xa que os servizos mínimos son do 100% para este colectivo.
Ademais da redución da xornada laboral que actualmente é de 12 horas, demandan que o dereito a realizar unha segunda actividade quede plasmado no acordo, "para aqueles traballadores que se puidesen acoller a ela de forma voluntaria", debido a que "o 50% dos traballadores teñen unha idade superior aos 50 anos e empezan a sufrir achaques e enfermidades, en moitos casos graves".
O representante da CIG pide que se inclúan as enfermidades profesionais neste sector
Así mesmo, Couselo reclamou que "se regulen" e se inclúan as "enfermidades profesionais" nos axentes rurais e forestais, xa que "están a causar moitos achaques a un colectivo xa envellecido" e que "necesita aumentar o persoal", algo que non se fixo durante os últimos 30 anos. Respecto diso, censurou que "nin se cobren baixas nin vacacións", mentres que "na época de máximo risco auméntase o reforzo de persoal laboral, pero dá a casualidade de que as baixas e vacacións nunca veñen reforzadas, nin en período de máximo risco".
REUNIÓNS. O responsable de CIG Autonómica sinalou que por mor da praga de icendios do pasado 15 de outubro a Administración iniciou as negociacións para atallar os incendios, pero no entanto, asegurou que estas reunións "eran infrutuosas", porque se lles presentaba "un acordo con condicións de traballo que empeoraba o de 2004". Ante esta situación, explicou que os sindicatos están "abertos ás negociacións e ao diálogo", porque queren "evitar que a irresponsabilidade por parte da Administración a teña que sufrir a poboación en xeral".
Por outra banda, o responsable sindical da CIG advertiu que a Administración autonómica "intenta dividir aos traballadores", porque a Consellería de Medio Rural "impón uns servizos mínimos abusivos do 100%, que coartan a liberdade do dereito á folga". Pola súa banda, Medio Ambiente impón só uns do 20%, co obxectivo de que os traballadores "non secunden a folga".
Así mesmo, asegurou que a titular de Medio Rural, Ángeles Vázquez, "nunca accedeu a reunións" e "chamou aos corpos e forzas de seguridade do Estado para botar aos axentes da súa consellería".
