O número de contaxios de covid-19 en Galicia na última xornada volveu a situarse por baixo de 50, en concreto en 37, aínda que os casos activos seguen por enriba dos 500, ata alcanzar os 512. Ademais, hai catro pacientes máis nos hospitais, dous deles en Uci.
Atendendo aos datos do Servizo Galego de Saúde (Sergas) —reunidos ata as seis da tarde do venres—, hai sete persoas máis con infección activa que na xornada anterior, aínda que se produciron 19 contaxios menos. Nos hospitais galegos hai 29 persoas ingresadas con covid.
Desde o inicio da pandemia contaxiáronse 183.189 persoas en Galicia, das que se curaron 180.059, trinta delas na última xornada. A cifra de falecidos segue en 2.652, igual que o día anterior.
A incidencia acumulada aumentou lixeiramente, ata situarse en 18,17 casos a 14 días por cada 100.000 habitantes, un punto máis que o día anterior. Con todo, Galicia mantense na situación da chamada nova normalidade, ao estar por baixo dos 25 casos por 100.000 habitantes, por baixo da media española de 49,86, segundo os datos facilitados este venres polo Ministerio de Sanidade.
En canto á porcentaxe de probas PCR que dan resultado positivo, Galicia está no 1,22% fronte ao 2,55% estatal.
Por áreas sanitarias, os casos activos incrementáronse na Coruña, con 143 (+4); en Ferrol, con 35 (+2); Ourense, con 99 (+13) e seguen igual en Lugo, con 38. Mentres, reducíronse en Pontevedra, con 65 (-2); Santiago, con 56 (-7); e Vigo, con 78 (-3).
En Galicia administráronse 4,4 millóns das vacinas contra o covid-19 e xa hai 2.293.337 persoas coa pauta completa.
