O secretario xeral do PSdeG-PSOE, Gonzalo Caballero, criticou que o expresidente do Goberno, Mariano Rajoy, e o titular da Xunta, Alberto Núñez Feijóo, "enganaron e tangaron" aos galegos nos seus compromisos en materia de infraestruturas, "deixando de gastar" o que estaba orzado.
Caballero reaccionou con "incredulidade" cualificando de "surrealista" que Feijóo –ao que tachou de "cómplice" desas "fraudes" agora "intente sacar a bandeira de reclamar os intereses de Galicia".
Tras participar nun encontro informal coa nova subdelegada do Goberno en Pontevedra, Maica Larriba, que fará a súa presentación oficial este xoves ante o delegado do Goberno en Galicia, Javier Losada, Caballero apostou por apoiar "con toda a forza" ao novo Goberno encabezado por Pedro Sánchez.
Caballero admitiu que "ten unha aritmética complexa" no Congreso, aínda que xustificou que o cambio era "necesario por dignidade e responsabilidade", para contar cun Executivo "que condene a corrupción e sexa crible nos seus compromisos".
Neste sentido, o secretario xeral do PSdeG-PSOE asegurou que os socialistas van facer ben o que o PP con Feijóo e Rajoy fixeron mal" en relación á chegada do Ave a Galicia.
Segundo Caballero, "nin unha soa decisión de Pedro Sánchez e o novo ministro de Fomento" fará que se poida atrasar nin un só segundo", argumentando que "os orzamentos que se están executando son os que aprobou o PP".
Ademais, Gonzalo Caballero engadiu que o propio ministro de Fomento, José Luís Ábalos, "trasladou a Adif que todo o previsto se faga coa maior celeridade posible".
"INCUMPRIMENTOS". Entre "a débeda de incumprimentos" que atribuíu ao PP, Caballero incluíu tamén as obras inconclusas de ampliación da ponte de Rande tras a "inauguración fraudulenta" do pasado mes de decembro, así como a retirada da peaxe a Redondela anunciada para este mes de xullo cando a estas alturas "non houbo avances nin acordos coa concesionaria".
Por iso, insistiu en acusar a Rajoy e a Feijóo de que "enganaron" aos galegos e a este último de ser "cómplice" do primeiro cando "deixou de gastar 2.000 millóns de euros que estaban orzados e non se executaron".
Precisamente, sobre o titular da Xunta, o secretario do PSdeG-PSOE advertiu que, en primeiro lugar, "perdeu o rumbo buscando a promoción da súa candidatura en España" e posteriormente "lamentándose de non poder ir", en alusión á renuncia de Feijóo a optar ás primarias do PP.
En segundo lugar, Caballero sinalou que acabou "errando no seu apoio a candidaturas que non triunfaron" no proceso interno dos populares.
