Os casos de coronavirus que afectan as escolas infantís e centros de ensino non universitario de Galicia seguen en aumento. O número de positivos ascende este mércores a 341, que son case 40 máis que na xornada anterior e obrigan a manter pechadas 45 unidades nese tipo de instalacións. O caso máis preocupante localízase no Ceip As Mercedes de Ourense, que rexistra un brote con nove menores contaxiados nunha mesma aula e 11 en toda a escola.
O primeiro caso detectouse o pasado martes e activouse o protocolo, aínda que nese momento descoñecíase o alcance e as autoridades sanitarias non decidiron pechar a aula ata o día seguinte. A partir de aí, cada día confirmáronse novos positivos no centro ourensán.
Nove deles concéntranse na mesma aula de Primaria, aínda que de momento descoñécense as circunstancias do contaxio entre os menores, segundo indicaron a Europa Press fontes do centro.
A Xunta tampouco cualificou o caso, de momento, como un brote de orixe escolar e este luns informábase dun brote familiar e social con polo menos 10 positivos en menores e tres adultos (un home de 46 anos e dúas mulleres de 57 e 47 anos), todos eles en Ourense.
Son 220 os centros educativos da comunidade nos que se rexistrou algún contaxio entre os seus alumnos ou profesorado
Á espera de máis datos, familias de alumnos do colexio trasladan a súa preocupación pola situación. A Anpa Pía da Casca recorda que hai dúas clases afectadas e subliñan que unha delas é "a máis numerosa do colexio", con 24 alumnos.
Segundo denuncian, os menores estiveron merendando dentro da aula, sen máscara e cunha ventilación inadecuada durante o horario lectivo, o que considera "unha clara neglixencia". "Quedou demostrada a falta de eficacia do protocolo de mínimos" aprobado pola Xunta nun centro con falta "de instalacións" e con dependencias "de tamaño reducido", que pon "en xogo a saúde de moitas familias", asegura a Anpa.
A Consellería de Educación, mentres, subliña que están a aplicarse os protocolos establecidos polas autoridades sanitarias desde o momento no que se detectaron casos positivos. Nese sentido, asegura que se está actuando "coa a máxima dilixencia e mantendo unha comunicación constante" cos equipos directivos, aos que se informa dos pasos a seguir.
GALICIA. A área de Ourense é precisamente a que rexistra maior número de casos en centros educativos, con 74 contaxios e 10 aulas pechadas, seguida da Coruña (72) e Pontevedra, con 52 positivos. En Lugo contabilízanse 47, en Santiago 41 e en Ferrol, 7.
Ademais do Ceip As Mercedes, destacan os casos do CPR La Grande Obra de Atocha da Coruña, con seis positivos confirmados; o Ceip Plurilingüe de Pedrouzos (Brión) con catro; o CPR Fingoi de Lugo —catro casos e unha aula pechada—, ou o Ceip Ramón da Sagra, con dous contaxios e dúas aulas pechadas.
Tamén se detectaron dous positivos no Ceip Veleiro Do Campo (Castro de Rei), un no CPR Plurilingüe La Merced de Sarria, o CIFP A Carballeira-Marcos Valcarcel, Ceip Amadeo Rodríguez Barroso, CPI José García García e o IES Julio Prieto Nespereira, estes catro en Ourense.
En Xinzo de Limia, ademais, hai tres casos no Ceip Rosalía de Castro, e outro máis no Ceip Plurilingüe de Ribadavia, mentres que en Pontevedra apareceron positivos no Ceip Plurilingüe Froebel e o IES Luis Seoane.
A área de Vigo, mentres, suma contaxios nestes centros: o IES Pazo da Mercé das Neves, o Ceip de Sárdoma-Moledo, o CPR Cebem, o CPR Plurilingüe Alba, o CPR San Francisco e o IES Ricardo Mella.
