José Enrique Abuín Gey, alias O Chicle, utilizou este martes o seu última quenda de palabra no xuízo polo crime de Diana Quer para pedir desculpas á familia. "Pido novamente perdón, non teño máis que dicir que non diga a miña avogada", apuntou.
Tras terminar a intervención da súa letrada nas conclusións finais do proceso, o presidente do Tribunal, Ángel Pantín, díxolle que podía facer uso da súa última quenda de palabra, algo que Enrique Abuín aceptou. Acaba este martes unha vista na que prestaron declaración medio centenar de testemuñas e 40 peritos para tratar de achegar luz a un crime cometido o 22 de agosto de 2016.
A acusación particular que exercen Juan Carlos Quer e Diana López-Pinel, os pais de Diana, do mesmo xeito que o ministerio fiscal, esixen para o acusado a condena a prisión permanente revisable por detención ilegal, asasinato alevoso e agresión sexual. Fronte a iso, Fernanda Álvarez, avogada que pola quenda de oficio representa ao Chicle, mantén a súa petición de dous anos e medio por un homicidio imprudente, pero contempla como subsidiaria a solicitude de homicidio doloso cunha condena de entre cinco e sete.
"Unha dor permanente non xustifica unha prisión permanente", di a avogada de Abuín
Nas súas conclusións, a avogada da defensa de Abuín reiterou este martes que "non hai probas" para acreditar que O Chicle violou e asasinou a Diana Quer o 22 de agosto de 2016, unha cuestión que atribuíu a unha "obsesión por inculpalo" dentro dunha "farsa" de xuízo no que asegurou que non se respectaron os dereitos constitucionais".
Por iso, advertiu ao xurado da posibilidade de que fosen "sobresuxestionado": "Vostedes non se poden converter nunha ferramenta da vinganza", sentenciou.
A letrada comezou o desenvolvemento das súas conclusións expresando o seu "respecto" á familia Quer e á súa dor, á vez que subliñou que o seu defendido "non é inocente", se non culpable da morte, aínda que accidental, e de "lanzar" o corpo de Diana a un pozo, algo que "é horrible". "É unha dor permanente, pero non xustifica a prisión permanente", engadiu María Fernanda Álvarez, para incidir en que a pena que está en xogo é "a cadea perpetua". A avogada Fernanda Álvarez discerniu entre un "ligón baboso" que acaba por accidente cunha vida e "un violador".
Na súa alegación, que durou máis de dúas horas e cuarto, criticou o papel e a "toxicidade" dos medios de comunicación, que "ata privaron de nome e de apelidos" a Enrique Abuín. "É unha persoa, e tratárono como a un monstro", dixo a letrada, para quen o acusado "non ten maldade".
