O Concello da Fonsagrada dedicará preto de 75.000 euros do plan único a embelecer a entrada do Camiño de Inverno na capitalidade do municipio.
Por unha banda, con 47.992 realizará a limpeza e o saneado do muro de formigón próximo ao antigo instituto, para que posteriormente poida lucir un grafiti relacionado coa temática xacobea. Ademais, na mesma zona, reconstruirá un tramo de muro que se perdeu con pedra, por un valor de 26.471 euros.
No capítulo dos investimentos cos fondos do plan único, destaca tamén a creación de dúas pistas de pádel cun desembolso de 43.412 euros. O rexedor municipal xustificou este investimento no interese que este deporte está a xerar nos mozos do municipio, que incluso se desprazaban a Lugo para poder practicalo. As pistas están programadas na zona deportiva dos Chaos, no pavillón do instituto que actualmente está sen utilizar, polo que están pendentes da aprobación da Xunta para determinar esta localización.
