A Audiencia da Coruña condenou a nove anos de cárcere a un home de 83 anos de idade acusado de abusar sexualmente de dúas irmás, cando tiñan 11 e 12 anos na Coruña, que eran as sobriñas da exparella do seu fillo, que as acolleu formalmente.
Os maxistrados tamén lle impuxeron seis anos de liberdade vixiada e a obrigación, durante este tempo, de participar en programas formativos de educación sexual. Ademais, deberá indemnizar a cada unha das vítimas con 3.000 euros.
O tribunal considera acreditado que o imputado, que era o pai da exparella da nai de acollida das nenas, aproveitaba as ocasións nas que acudían á súa vivenda e estaba a soas con elas para realizarlles tocamentos. Unha das vítimas padece unha discapacidade psíquica dun 47%.
A Audiencia considera probado que a partir do ano 2013, cando as nenas contaban con 11 e 12 anos de idade, o acusado aproveitando "circunstancias e momentos nos que as menores non se achaban acompañadas e non podería ser visto por adultos" no seu domicilio, especialmente nunha habitación na que adoitaban descansar as nenas xunto á súa curmá, "introducía as súas mans baixo as pezas superiores que aquelas vestían e acariñáballes os peitos".
