Os positivos por covid-19 confirmados por PCR nas últimas 24 horas descenderon a 597, deles 155 na área de Vigo e 109 na de Pontevedra. Son case 200 menos que os contabilizados diariamente durante o pasado fin de semana –775 o domingo e 755 o sábado–.
Así se reflicte nos datos actualizados este luns na páxina web da Consellería de Sanidade con rexistros ata as 18.00 horas do domingo, nos que se indica que na área sanitaria da Coruña e Cee detectáronse 104 positivos confirmados por PCR nas últimas 24 horas; 87 na de Ourense; 55 na de Santiago e Barbanza; 48 na de Ferrol e 39 na de Lugo.
En canto aos casos activos, descenderon nas áreas de Santiago e Barbanza, que conta con 1.360 –12 menos que este domingo– e na de Lugo ata os 983 –tres menos–, mentres que aumentaron no resto.
En concreto, Vigo ten 2.072 –52 máis–; A Coruña, 1.575 –34 máis–, Ourense, 1.299 –23 máis–; Pontevedra e O Salnés 1.049 –55 máis– e Ferrol, 954 –24 máis–.
Ata a data curáronse en Galicia 27.752 persoas, o que supón 422 máis que a xornada deste domingo e realizáronse 700.353 PCR fronte ás 692.643 contabilizadas a xornada anterior.
Desde o inicio da pandemia contaxiáronse por covid-19 na comunidade galega 37.966 persoas e leváronse a cabo, ademais, 401.091 probas serolóxicas.
FALECIDOS. Galicia rexistrou ata o momento 923 falecidos con coronavirus covid-19, os últimos nove notificados na tarde deste domingo, cinco deles procedentes de residencias de anciáns.
O xoves pasado, xornada na que se notificou o maior número de mortos nun mesmo día desde que comezou a segunda onda (13), superouse a barreira dos 900 falecementos con coronavirus.
A primeira morte computada na comunidade na denominada nova normalidade foi a dunha muller o 7 de agosto. Antes diso, Galicia encadeara case dous meses –desde o 10 de xuño– sen decesos relacionados coa pandemia.
HOSPITALIZADOS. Os pacientes con coronavirus covid-19 ingresados en hospitais en Galicia aumentaron a 523, o que supón 41 máis que os contabilizados este domingo, deles 77 en Unidade de Coidados Intensivos (Uci) –tres máis– e 446 noutras unidades de hospitalización –38 máis.
