A decisión de Gonzalo Caballero, máximo dirixente do PSdeG de xuntar o día 18 de novembro as primarias para as municipais de 2019 coas de elección do candidato á Xunta en 2020 non resultou do agrado dos dirixentes provinciais socialistas de Lugo e A Coruña, Álvaro Santos e Valentín González Formoso, respectivamente.
Ambos expresaron as súas discrepancias na reunión celebrada este mércores na compostelá Rúa do Pino, onde saíu adiante a proposta de Gonzalo Caballero.
Segundo fontes internas do partido, Formoso e Santos -con voz pero sen voto- expresaron a súa preocupación por facer coincidir ambas as convocatorias, porque consideran que agora resulta prioritario centrarse nas municipais. Ademais, cren que é demasiado pronto para as primarias para optar á Xunta, porque aínda faltarían dous anos para as eleccións e porque esta "precipitación" fai que non dea tempo a preparalas debidamente.
No entanto, Santos evitou este mesmo xoves pronunciarse sobre o asunto a AGN e dixo que el acepta sempre as resolucións adoptadas de forma democrática polo seu partido e polo seu líder.
Á reunión da executiva non acudiron dirixentes das agrupacións provinciais de Ourense e Pontevedra, aínda que si houbo unha ampla representación do partido, que decidiu apoiar ao seu líder. Entre elas a coruñesa Eva Martínez Acón, que ve "acertado" que haxa primarias en novembro a fin de que o partido estea "preparado" para o que veña.
Ese é o argumento do xefe de filas dos socialistas galegos, Gonzalo Caballero, que remitiu unha carta a militancia do PSdeG na que sinala que o Partido Socialista en Galicia debe "estar preparado" para "os tempos electorais que se aveciñan".
Caballero remitiu esta misiva con motivo da decisión da dirección do partido de celebrar o 18 de novembro primarias para decidir candidato á Xunta, na mesma xornada na que terá lugar o proceso interno que decidirá aos candidatos ás alcaldías dos municipios de máis de 20.000 habitantes.
No texto, o líder do PSdeG recorda que "neste mes de outono" cúmprese un ano desde que se fixo coas rendas do partido. "Ao longo deste tempo dediquei o meu esforzo e ilusión a impulsar o socialismo galego para alcanzar un cambio político en Galicia", indicou.
Neste compromiso, segundo sinala Caballero, "o apoio da militancia de base" resulta "fundamental" para "manter a intensidade dun traballo" que lle levou a percorrer o país, "concello a concello".
