Os deputados provinciais do BNG en Lugo renuncian ás súas áreas de goberno

Os dous deputados provinciais do BNG na Deputación de Lugo, Xosé Ferreiro e Antonio Veiga, presentaron este martes ante o secretario xeral da institución a súa "renuncia" a todas "as responsabilidades de goberno" que asumiron o pasado mes de outubro cando quedou constituído o bipartito co PSdeG.

O que foi vicepresidente da Deputación, Antonio Veiga, insistiu en que os orzamentos aprobados este lunes polo PP, o PSdeG e o deputado non adscrito, Manuel Martínez, son os das "prebendas" dos populares. Segundo Veiga, o Partido Popular aproveitou a situación xerada na Deputación de Lugo coa saída de Manuel Martínez do grupo provincial socialista para "boicotear a provincia" e mantivo "paralizada" a institución polos seus "intereses particulares", dado que só se mostrou preocupado por "que hai do meu".

Veiga mostrouse satisfeito polo feito de que os nacionalistas non estean "na foto das Azores" que se produciu este martes no "salón de actos" da Deputación de Lugo.

Pola súa banda, o portavoz do BNG, Xosé Ferreiro asegurou que os nacionalistas non van estar nas institucións unicamente para "ocupar unha cadeira" ou "pisar moqueta", porque o seu "traballo político é comprometido cos traballadores e pegado ao país", de modo que prefiren manchar "os zapatos de po nas empresas, que estar apolillándose nunha cadeira de brazos sen facer nada do que viñan facer". "Esta noite deixamos as portas abertas dos despachos, quedaron os papeis encima da mesa e os computadores acesos. O que non imos facer é formatealos e pisar os discos duros, como fixo a portavoz do PP- Elena Candia cando se tivo que marchar, porque pasou o día transportando papeis" e destruíndo "os discos para que non se soubese a información que había neles".

Tamén dixo Ferreiro que os nacionalistas quedan "a total disposición do goberno da Deputación para colaborar en todo aquilo que sexa necesario", porque a intención do BNG é facer unha "oposición completamente responsable", aínda que "dura". Falou, ademais, de "coherencia" e asegurou que o BNG "non vai defender absolutamente nada na oposición que non defendese no goberno".

O portavoz nacionalista confirmou que será "difícil reconducir" a relación co Partido Socialista para reeditar o bipartito antes de que finalice o presente mandato. "Véxoo complicado, unha vez que pasou isto, pero nada se descarta", engadiu, porque "en política é moi difícil facer unha afirmación que sexa contundente e categórica".

"Non nos imos co corazón partido. Non nos imos cunha mala relación nin moito menos. A política é así e as relacións persoais non teñen nada que ver coa política. Ademais, a nosa intención é seguir falando de forma continuada co goberno da Deputación, para pornos á súa disposición e que a transición sexa o máis adecuada posible".

Ferreiro recordou, en todo caso, que o Partido Socialista rompeu na Deputación de Lugo un "acordo nacional", extensivo ás tres institucións provinciais galegas nas que hai gobernos de coalición.

Desde o seu punto de vista, foron os socialistas quen os obrigaron "a deixar o goberno", polo que espera que o PSdeG "diga se" o sucedido en Lugo foi unha "decisión do partido" ou algo que "fixeron por libre" o presidente da Deputación e "algún máis". É algo que "teñen que aclarar de forma urxente", porque as "relacións entre o PSdeG e o BNG non poden ser as mesmas que foron ata este momento".