A Garda Civil desarticulou un importante punto de venda na Guarda e detivo a un home de 33 anos por un presunto delito contra a saúde pública por tráfico de drogas.
As investigacións comezaron hai meses despois de ter sospeitas de que o detido vendía droga polo miúdo nunha vivenda da Guarda á que acudían asiduamente consumidores habituais da comarca.
O arresto produciuse este luns no marco dun operativo especial coordinado polo Posto da Garda Civil da Guarda no que interviñeron efectivos dos Postos de Tomiño e Tui para poder interceptar o vehículo no que circulaba esta persoa que fora detectada no Porriño por efectivos da Policía Local.
Ao inspeccionar o vehículo incautóuselle unha bolsa con medio centenar de doses de heroína, oito pastillas de metadona, outra bolsa cunha pequena cantidade de cocaína e 820 euros en efectivo.
O detido, que conta cun amplo historial de detencións por delitos contra o patrimonio, será posto a disposición do Xulgado de Instrución nº 1 de Tui.
