O Xulgado de Vilagarcía desestimou a solicitude dunha orde de afastamento requirida pola veciña de Vilanova de Arousa que o martes denunciou a Manuel Charlín por agresión. O titular do Xulgado que instrúe o caso decretou que a causa segue o seu curso por un delito de lesións, aínda que non acordou a medida cautelar solicitada por entender que "non concorren motivos suficientes".
Manuel Charlín Gama compareceu nos Xulgados de Vilagarcía para declarar como acusado por unha presunta agresión que tivo lugar o luns e da que foi vítima unha veciña de Vilanova residente nun edificio cuxa propiedade está vinculada á familia dos Charlines. Tamén a muller agredida compareceu este mércores ante o xuíz, a quen solicitou unha orde de afastamento con respecto ao patriarca do clan.
A vítima aduce que ademais da agresión recibida hai uns días, pola que tivo que ser atendida no hospital do Salnés, sofre continuas ameazas e insultos por parte de Manuel Charlín.
A pesar diso, o xuíz instrutor non considerou suficientes os seus argumentos polo que non ditou a orde de afastamento solicitada.
"NINGUÉN VAI QUEDAR SEN PROTECCIÓN". Preguntada respecto diso da situación pola que están a pasar algúns veciños de Vilanova, a subdelegada do Goberno en Pontevedra, Maica Larriba, sinalou que "todas as medidas para protexer á xente están a cargo das Forzas e Corpos de Seguridade do Estado. E ninguén que necesite protección vai quedar sen ela".
A subdelegada engadiu que non dispón de ningunha nova información acerca da investigación que a Garda Civil está a levar a cabo respecto ao incendio que a noite do domingo calcinou dous coches xusto en fronte dun edificio propiedade dos Charlines.
Dáse a circunstancia de que o propietario dun dos coches calcinados é un dos inquilinos do edificio que en varias ocasións denunciara a membros da familia Charlín por presuntas ameazas e cortes de servizos cos que intentaban provocar o seu desaloxo.
