A Policía Nacional detivo en Benidorm un home de 39 anos como suposto autor de estafas en diferentes lugares da xeografía española por un valor superior aos 35.000 euros, mediante vendas fraudulentas en plataformas de compravenda de obxectos online, unha delas realizada en Santiago, segundo informou a Xefatura nun comunicado.
A investigación levárona a cabo axentes da Brigada de Policía Xudicial da Comisaría de Benidorm, concretamente do grupo de delitos tecnolóxicos, quen a través dunha denuncia que presentou unha das súas vítimas, seguiron a pista do presunto estafador ata lograr perpetrar a súa detención. O detido creara varios perfís en diferentes plataformas online de compra e venda de produtos e contaba con cinco contas bancarias. Foi arrestado en Benidorm o pasado 26 de xullo acusado dun delito continuado de estafa.
O presunto estafador colgaba todo tipo de obxectos, particularmente material electrónico a un prezo por baixo do seu valor para así captar rapidamente ás súas vítimas. Unha vez que o comprador se interesaba polo articulo en venda, o detido dáballe indicacións da conta bancaria ou aplicación que debía utilizar para facer o pago, aínda que, en lugar de facerlle entrega do obxecto comprado segundo o pactado, apropiábase do diñeiro.
Segundo informou a Policía, o detido estivo a cometer estes delitos de xeito habitual durante preto de seis meses, ata que foi descuberto pola Policía Nacional e detido por axentes da Comisaría de Benidorm. A investigación rexistrou ata o momento seis estafas cometidas polo detido nas cidades de Madrid, Pamplona, Santiago de Compostela e Bilbao.
