A Dirección Xeral de Tráfico (DXT) iniciará o luns unha campaña especial de control do uso do cinto de seguridade e dos sistemas de retención infantil, segundo informa a Delegación do Goberno en Galicia. Durante toda a semana, ata o domingo 17 incluído, os axentes da Agrupación de Tráfico da Garda Civil intensificarán os controis para comprobar que tanto o condutor como os ocupantes dos vehículos fan uso do cinto de seguridade.
Comprobarán, de igual modo, que os menores viaxan cos correspondentes sistemas de retención infantil adecuados á súa estatura, peso e idade. Tamén se invitou aos concellos a sumarse a esta campaña, "dada a relevancia de que os condutores adquiran o hábito de usar os cintos na contorna urbana", sinala a Delegación do Goberno.
Esta iniciativa enmárcase dentro da programación de campañas especiais de vixilancia previstas pola DXT para este ano co obxectivo de mellorar a seguridade viaria e concienciar aos usuarios das vías sobre a importancia de manter comportamentos máis seguros.
SINISTRALIDADE. No balance de sinistralidade de 2018, o delegado do Goberno en Galicia, Javier Losada, advertiu que o 23% dos falecidos en turismos e furgonetas nas estradas galegas en 2018 non estaba a facer un uso adecuado destes dispositivos de seguridade no momento do accidente.
Tamén sinalou que non usar estes dispositivos estivo detrás de máis de 8.500 sancións do total que impuxo a Agrupación de Trafico da Garda Civil en Galicia o ano pasado.
CONTROIS EN MARZO DE 2018. Por outra banda, na campaña especial que se celebrou en marzo de 2018, os axentes de Tráfico controlaron en Galicia 35.853 vehículos nos que detectaron 334 infraccións de condutores ou pasaxeiros que non facían uso do regulamentario sistema de retención.
Polo tipo de vehículo, un 87,7% dos controis corresponderon a turismos (31.466) que, xa que logo, acumulan a maior porcentaxe do total de denuncias (283, un 84,7% do total). Séguenlle os vehículos de transporte de mercancías con 2.869 vehículos controlados e 48 denuncias.
