Dous emprendedores, o matrimonio formado por Alba López López e Javier Arias Díaz, crearán no Camiño de Santiago en Sarria un campamento turístico, que estará formado por cinco cabanas e unha zona glamping con tres tendas de campaña.
As instalacións, co nome A Leira 116, abrirán ao comezo do verán, segundo a previsión dos promotores. Estarán situadas no núcleo do Carballal, a pouca distancia da entrada á vila sarriá pola ruta xacobea.
Deste pobo é orixinaria Alba López, quen explica que queren presentar un aloxamento "diferente". "Queremos ofrecer algo que agora está en auxe e non hai nada pola zona", afirma. O establecemento diríxese principalmente ao peregrino, ao atoparse en pleno Camiño de Santiago, pero tamén a turistas.
"Poden desprazarse a Lugo ou a Ribeira Sacra. Hai tamén moitas rutas de sendeirismo ou bicis, teñen ou club de golf cerca... Hai moitas posibilidades para ofrecer un turismo activo e para os peregrinos darlles unha estancia diferente", apunta a sarriá, quen estudou mercadotecnia. Pola súa banda, Javier Arias é deseñador gráfico e ambos contan cunha empresa na Coruña, Aa Estudo, dedicada tamén ao interiorismo.
As obras do negocio comezarán a próxima semana, pois xa dispoñen da licenza do Concello. Para os traballos contan cunha subvención do Grupo de Desenvolvemento Rural (GDR) Miño-Ulla. Os emprendedores agradecen a axuda prestada pola administración local por facilitarnos "a tramitación das licenzas", así como ao "GDR e a todos os veciños e amigos que nos están apoiando neste novo camiño".
O negocio situarase no Carballal e prevén poñelo en marcha ao comezo do verán
DECORACIÓN GALEGA. O campamento situarase, como o seu propio nome indica, no quilómetro 116 do Camiño. Estará nuns terreos de 14.000 metros cadrados, que dispoñen dun piñeiral e unha carballeira. Na leira construiranse cinco cabanas, tres delas con capacidade para tres persoas e dúas para dous hóspedes. Serán de madeira, de cor negra, e con decoración "moi galega, pero reinventada".
Na zona glamping estarán as tres tendas de campaña, realizadas en algodón "orgánico" e con todas "as comodidades", pero "para vivir máis tipo campamento", explica a empresaria.
As instalacións completaranse con dous módulos centrais, nos que se atoparán a recepción, uns aseos e unha cociña de uso común. Ademais, disporán dunha tenda con roupa deseñada por eles mesmos de merchandising da Leira 116 para que os visitantes leven un recordo do lugar. A isto sumarase, conta, unha zona de vending con dúas máquinas e outra de venda de produtos locais, como da panadería Pallares de Sarria.
As instalacións foron deseñadas por eles mesmos coa colaboración de Goc Creativos, sinala Alba López, quen engade que co proxecto queren que os hóspedes "gocen da experiencia de estar no rural".
Infancia
"É algo que vivín desde pequena. A xente paraba e algúns que ían en cabalo pedíanche permiso para pastar o animal, outros paraban a descansar onde un piñeiro", rememora a sarriá deses recordos da súa nenez.
