A entrada dunha fronte deixará este mércores precipitacións no litoral galego e unha forte caída das temperaturas.
Tras máis dunha semana de sol e valores máis propios da primavera que do mes de febreiro, a comunidade quedará desde primeira hora deste mércores baixo a influencia dunha borrasca localizada ao noroeste de Fisterra que deixará ceos parcialmente cubertos e choivas débiles, máis probables no litoral atlántico.
Segundo a previsión de Meteogalicia, as temperaturas mínimas quedarán sen cambios —oscilarán entre os 2 graos que se esperan en Lugo e os 12 de Vigo—, pero as máximas descenderán notablemente, xa que a fronte arrastrará aire atlántico máis frío. Así, os valores máis altos poden rexistrarse en Ourense (21 graos), mentres que no resto de cidades galegas manteranse entre os 15 e os 17 graos.
Os ventos, pola súa banda, soprarán frouxos do suroeste, con algún intervalo forte na costa atlántica.
XOVES. Galicia recuperará aos poucos a influencia anticiclónica o xoves, cando se espera unha xornada de tempo seco pero con néboas no interior e nubes altas pola tarde. En canto ás temperaturas, as mínimas descenderán lixeiramente e as máximas manteranse en valores similares ao mércores.