O secretario de Análise Estratéxica e Cambio Político e deputado de Podemos, Íñigo Errejón, viuse envolto, xunto aos seus dous acompañantes, nunha discusión con outras dúas parellas na zona monumental da capital galega na madrugada deste sábado.
O político desprazouse ata Santiago o venres para impartir unha charla na Universidade de Santiago de Compostela e acudir ao acto de gradación do alumnado de Ciencias Políticas. Finalmente decidiu aproveitar a viaxe para coñecer un pouco máis a cidade.
Unha das persoas implicadas decidiu pór en coñecemento da Policía Local o ocorrido aquela noite, como recolle El Correo Galego.
Segundo o diario compostelán, a discusión poderíase terse producido por dous motivos. Por unha banda, unha das parellas pediulle unha foto a Errejón e ao negarse, provocaría un enfrontamento entre estas persoas e os seus acompañantes. A outra versión sería que os viandantes cos que se cruzaron teríano "increpado" por pertencer a un partido político de ámbito estatal.
A Policía Nacional non estuda abrir unha investigación para esclarecer os feitos xa que non se presentou ningunha denuncia.
