Un grupo de estudantes da Universidade de Vigo desenvolverá tres versións dun videoxogo inspirado no roubo do Códice Calixtino. Estes traballos apoiaranse nun relato inédito do escritor e profesor Miguel Anxo Fernández sobre o roubo —en 2011— da que está considerada a primeira guía de peregrinos, subtraído por un exelectricista da catedral de Santiago.
Luís Fernández, Beatriz Legerén, Miguel Anxo Fernández e Antonio Pena, co alumnado participante non proxecto. UVIGO |
Preto dunha vintena de estudantes, divididos en tres grupos, desenvolverán tres versións do videoxogo inspirado neste caso, no marco dunha iniciativa promovida polo grupo de innovación docente ComtecArt (comunicación, tecnoloxía e arte). Os impulsores desta experiencia promoven cada semana sesións de traballo conxunto nos campus de Vigo e Pontevedra.
Así, un dos grupos optou por converter o ladrón do Códice Calixtino en protagonista dun xogo no que se combinan a aventura e a intriga con matices de humor. Outro equipo optou por centrar a trama na figura dun detective que investiga unha onda de crimes, mentres que o terceiro centrou a súa proposta nunha loita contra "curas satánicos".
Frank Soutelo é o personaxe central de Timo Calixtino, unha novela curta que Fernández escribiu en 2012 por mor da desaparición do Códice e que cedeu ao grupo de innovación para esta actividade.