O Promotor da Acción Disciplinaria do Consello Xeral do Poder Xudicial incoou expediente disciplinario á titular do xulgado de Vixilancia Penal número 3 de Lugo, María Jesús García, pola suposta comisión dunha falta moi grave.
En concreto, investígase se a xuíza do tarot exerceu "actividades incompatibles co cargo de xuíz ou maxistrado", establecidas no artigo 389 da LOPJ.
O expediente disciplinario ten a súa orixe na investigación iniciada no TSXG tras un escrito do presidente da Audiencia Provincial de Lugo no que comunicaba que tivera coñecemento de que a maxistrada "de forma pública reparte panfletos publicitarios (…), anunciándose como tarotista e vidente con gran experiencia en botar cartas de tarot". Este escrito deu lugar á apertura polo Promotor dunhas dilixencias informativas ás que se uniron varias informacións xornalísticas nas que se afirma que é a propia maxistrada a que realiza a citada actividade.
A incoación do expediente disciplinario, que ten como obxecto concretar e determinar os feitos e circunstancias da actuación da xuíza, así como as consecuencias de carácter disciplinario aplicables, xa foi notificada á maxistrada.
