Feijóo cre que as dúas candidaturas gañadoras "deben falar entre si"

O presidente da Xunta de Galicia e do PPdeG, Alberto Núñez Feijóo, dixo este xoves que os dous candidatos que resulten vencedores nas eleccións primarias que hoxe celebra o Partido Popular "deben falar entre si" e tratar de conformar unha única candidatura para o Congreso Nacional que se celebra os días 21 e 22 deste mes de xullo.

"Unha vez que se coñezan as candidaturas creo que deben falar entre si, sobre todo se son cuns resultados moi similares", afirmou Feijóo na rolda de prensa posterior ao Consello da Xunta.

"Non se trata de ver quen gana senón de ver como se pon en marcha e con impulso o Partido Popular, que é o primeiro partido de España, en votos, en escanos no Congreso e con maioría absoluta no Senado", indicou.

Apuntou que ata onde el sabe as votacións na xornada deste xoves das primarias do PP están a desenvolverse "con normalidade, polo menos en Galicia", e dixo que exercerá esta tarde o dereito a voto en Vigo aínda que non desvelou a quen.

"O importante é que a xente vaia votar", opinou o presidente galego, e expresou a súa confianza en que as dúas candidaturas que resulten vencedoras no día de hoxe "sexan as mellores para o partido".

Sobre a decisión do expresidente do PP Mariano Rajoy de non participar na xornada electoral, sinalou que levou o seu anuncio neste sentido "ata o estrito termo de non tomar posición e renunciar ao seu dereito a apoiar a un dos sete candidatos".

"Mantivo o seu guión, no sentido máis estrito da súa propia proposta", dixo Feijóo.